Kryeministri Edi Rama ka reaguar pas shpalljes së rezultateve përfundimtare të zgjedhjeve të pjesshme lokale, ku kandidatët e Partisë Socialiste kanë siguruar fitore në të pesë bashkitë ku u mbajt procesi zgjedhor: Vlorë, Berat, Cërrik, Tepelenë dhe Mat.

Në një deklaratë publike, Rama u shpreh se rezultatet janë një dëshmi e besimit që qytetarët vazhdojnë t’i japin Partisë Socialiste dhe qeverisjes së saj.

“5 bashki, 5 fitore dhe 5 arsye më shumë për t’i falënderuar qytetarët për besimin e tyre, pavarësisht dobësisë ekstreme të opozitës, motit me shi të ditës së djeshme apo vetë natyrës së zgjedhjeve të pjesshme, të cilat nuk është se e stimulojnë pjesëmarrjen”, deklaroi kryeministri.

Ai përgëzoi kandidatët fitues, duke përmendur veçanërisht Brunilda Mersinin, e cila bëhet gruaja e parë që do të drejtojë Bashkinë e Vlorës.
“Urime kryebashkiakëve të rinj, nga Bruna, gruaja e parë që do të drejtojë bashkinë e Vlorës; Ervini i dytë i Beratit, i cili me mbi 83% të votave dhe 13.049 vota nga 15.454 të PS në 11 maj për bashkinë Berat, ka arritur një rezultat mbresëlënës; Florenci në Cërrik, Gramozi në Tepelenë dhe Altini në Mat, që të tre me rezultate kuptimplota, të cilat janë një themel i fortë i punës që do të pasojë në shërbim të atyre komuniteteve,” shtoi Rama.

Zgjedhjet e pjesshme lokale u zhvilluan të dielën, me një pjesëmarrje të përgjithshme prej 18.72% në shkallë vendi. Procesi u zhvillua i qetë dhe pa incidente të raportuara, ndërsa numërimi përfundoi në orët e para të së hënës, duke shpallur fitoren e kandidatëve socialistë në të pesë bashkitë.