Kandidatja fituese e Partisë Socialiste për kryetare bashkie në Vlorë, Brunilda Mersini, ka siguruar se do të vijojë të jetë e përkushtuar ndaj qytetarëve të qytetit bregdetar, duke theksuar se puna e saj do të mbështetet në ndjeshmëri dhe përgjegjësi ndaj komunitetit.
Pas fitores me një diferencë të thellë ndaj dy kandidatëve të pavarur në zgjedhjet e pjesshme vendore të mbajtura më 9 nëntor, Dionis Sotës, i mbështetur nga opozita, dhe Gjergji Nikës, Mersini deklaroi se fitoren ia dedikon Partisë Socialiste.
“Pjesëmarrja prodhoi një fitore. Më e lartë? Kjo është relative. Në momentin që ka fitore, gjithmonë ka një analizë. Por e rëndësishme është fitorja. Do të jem e përkushtuar dhe me ndjeshmëri për qytetin. E njoh ritmin dhe energjinë e tij. Jam e përkushtuar ndaj njerëzve dhe kështu do të vazhdoj. Ia dedikoj fitoren PS,” u shpreh ajo.
Mersini vlerësoi gjithashtu edhe dy kundërshtarët e saj në garë, duke i cilësuar si bashkëqytetarë dhe bashkëpunëtorë të mundshëm në të ardhmen.
“Gjithmonë gara është garë. Kam respekt për dy bashkëqytetarët e mi, që nesër mund të jenë kolegë në dyert e bashkisë. Gjergji është anëtar i këshillit bashkiak dhe do të kemi takime të përditshme. Edhe Dionisi vjen nga biznesi,” shtoi ajo.
Në zgjedhjet e pjesshme vendore të zhvilluara dje, Brunilda Mersini siguroi 15,672 vota (78.4%), duke shënuar një diferencë të thellë me dy kandidatët e tjerë. Dionis Sota mori 2,333 vota (11.7%), ndërsa Gjergji Nika u rendit i treti me 1,975 vota (9.9%).
Me këtë rezultat, Brunilda Mersini bëhet gruaja e parë që drejton Bashkinë e Vlorës.
