Në konferencën e sotme për mediat, kryeministri Edi Rama deklaroi se publikimi i pagave të qytetarëve shqiptarë muaj më parë, ka pasur dhe anë pozitive pasi shumë biznese kanë reaguar pozitivisht.

Rama shprehu vlerësim për bizneset që kanë bërë ndryshime në pagat e punonjësve pas publikimit të tyre në dhjetor të 2021.

Rama: E keni parasysh çfarë efekti pati dalja e pagave në publik që përveç anës së vet negative kishte dhe një anë jo të vogël pozitive sepse i gjithë opinioni publik u ballafaqua me një realitet i cili pavarësisht rregullimeve në vite, ishte pasqyrë e një deformimi të madh, për të cilin ne jemi të vetëdijshëm e kemi qenë.

Sikundër e bëmë me dije, ngritëm njësinë speciale të anti informalitetit për të ushtruar një proces kontrolli të detajuar dhe për të na dhënë një analizë të gjithë situatës.

Vlerësojmë bizneset që deri tani kanë reaguar pozitivisht duke reflektuar ndryshimet në lidhje me pagat e punonjësve.