Kryeministri Edi Rama deklaroi sot se marka “Made in Albania” përfaqëson jo vetëm cilësinë, por edhe një pasaportë drejt Bashkimit Europian, dhe qeveria do të mbështesë eksportuesit që synojnë të përfitojnë nga kjo mundësi.

Gjatë pjesëmarrjes në tryezën e dialogut mes qeverisë dhe biznesit eksportues, ku u prezantua platforma e re ExportOn, Rama theksoi rëndësinë e largimit nga konkurrenca e çmimeve të ulëta dhe fokusin tek standardet e larta të certifikuara nga BE. Sipas tij, kjo rrit vlerën dhe fitimin përmes cilësisë dhe jo vetëm sasisë.

Kryeministri gjithashtu foli për sfidat dhe mundësitë e procesit të anëtarësimit në BE, duke theksuar se:

“Ata që do të jenë të gatshëm të adoptohen do të jenë fitues, ata që nuk do të dinë të adoptohen do të jenë humbës. Sot ne jemi në nisje të një tjetër viti shumë të rëndësishëm në këtë proces.”

Rama vlerësoi rolin e Agjencisë Shqiptare të Zhvillimit të Investimeve (AIDA), e cila sipas tij ka kthyer mbështetjen ndaj eksporteve në një mekanizëm efektiv që monitoron, asiston dhe orienton bizneset. Ai siguroi se qeveria do të vendosë eksportuesit në qendër të politikave mbështetëse, duke shfrytëzuar AIDA-n si pikë takimi midis biznesit dhe institucioneve shtetërore.