Kryeministri Edi Rama ka theksuar se ambicia e Shqipërisë nuk duhet të ketë kufij, duke e lidhur rritjen e interesit ndërkombëtar ndaj vendit me emërimin e një ministre jo-njeri.

Sipas tij, ky zhvillim ka tërhequr vëmendjen globale dhe ka ndikuar në ndërtimin e një imazhi të ri për Shqipërinë si vend inovativ dhe të hapur ndaj teknologjisë.

“Ne nuk duhet të vendosim limit në ambicien tonë. Tërheqja ndaj Shqipërisë është edhe më e madhe, madje është rritur ditët e fundit, sepse pavarësisht se çfarë thuhet këtu, gjithë bota merret me ministren tonë jo njeri. Kjo në thelb e bën vendin më tërheqës, si një vend që ka arritur të ketë një ministër jo njeri, ku ambicia është e madhe dhe hapja ndaj teknologjisë është e plotë,” u shpreh Rama.

Ai shtoi se interesi për këtë fenomen ka shënuar rritje të ndjeshme, duke treguar se mediat ndërkombëtare i kanë kërkuar vazhdimisht intervista për këtë temë.

“Çdo 3-4-5 ditë kam kërkesa për intervista nga jashtë për të shpjeguar këtë fenomen. Është krijuar interes dhe kjo ka impaktin e vet në imazhin e vendit,” deklaroi kreu i qeverisë.