Kryeministri Edi Rama në një konferencë për mediat sqaroi se pse nuk u linjëzua me deklaratat e Bashkimit Evropian në lidhje me ngjarjet e fundit në Kososvë.

Zëdhënësi për shtyp i BE-së tha dje se unioni nuk do të mbajë asnjë qëndrim derisa të zbardhet plotësisht ngjarja në Banjskë.

BE refuzoi kështu të dënonte Serbinë për sulmet në veri të Kosovës ku si pasojë humbi jetën një rreshter i policisë së Kosovës. Rama u shpreh se moslinjëzimi me BE-në nuk u prit mirë në Bruksel.

Edi Rama:

“Ne thamë se s’kemi ndonjë rezervë me deklaratën në vetvete, por njëkohësisht kemi theksuar domosdoshmërinë, sipas nesh, që ndikimi i kësaj deklarate duhej të bëhej njëkohësisht apo të paktën të pasohej pa humbur kohë, nga një deklaratë e dytë mbi  zhvillimet e patolerueshme në veri të Kosovës. Na u tha se nuk është e mundur momentalisht dhe se deklarata kritike ndaj Kosovës e kishte marrë aprovimin e vendeve anëtare dhe pritej të linjëzohej edhe Shqipëria. Përgjigja jonë ishte negative dhe nuk u pëlqye. Qëndrimi im nuk ndryshon, jemi gati të linjëzohemi sapo të dalë deklarata që ne presim. Ky qëndrim ka të bëjë me çbalancimin total që deklarate e djeshme krijon në këto momente kaq dramatike, kur situata mund të përkeqësohet nga java në javë, dita ditë, apo në orë.”