Kryeministri Edi Rama, në një takim me deputetët e Partisë Socialiste të qarkut të Tiranës, është ndalur te operacioni për lirimin e hapësirave publike në zona turistike si Thethi, duke mohuar zërat se po përgatitet terreni për ndërtimin e resorteve.

“Nuk bëhet fjalë për ndonjë plan ndërtimi resortesh turistike. Kjo është jashtë çdo lloj opsioni. Të gjitha këto teori që qarkullojnë janë thjesht dezinformim. Ata që bëjnë zhurmë nuk janë banorët e Thethit,” u shpreh Rama.

Ai theksoi vendosmërinë për të ndaluar një herë e mirë logjikën e ndërtimeve të paligjshme, duke paralajmëruar se çdo objekt i ngritur në kundërshtim me ligjin do të shembet.

“Kemi marrë përsipër që brenda vitit 2028 të përmbyllim procesin e legalizimit. Por kush mendon se mund të ndërtojë sot për të legalizuar nesër, e ka gabim. Kjo histori ka marrë fund. Çdo ndërtim që shkel infrastrukturën apo hapësirën publike do të rrafshohet,” tha Kryeministri.

Reforma në sektorët jetikë: Naftë, ujë të pijshëm dhe menaxhim mbetjesh

Rama paralajmëroi edhe një reformë të re në sektorin e furnizimit me naftë, që sipas tij do të sjellë më shumë kontroll mbi çmimet dhe transparencë për qytetarët. Për këtë, ai bëri të ditur se do të përdoren mekanizmat ligjorë për të garantuar ndërhyrje efektive.

“Shumë shpejt, për naftën dhe për ujin e pijshëm, do të ndërhyjmë edhe përmes aktit normativ. 83 votat që kemi në Kuvend do t’i përdorim për të kaluar në një realitet të ri – nga një Shqipëri europiane në shpirt, drejt Shqipërisë si anëtare e BE-së në praktikë,” deklaroi Rama.

Ai paralajmëroi se do të krijohet një korporatë e re për shpërndarjen e ujit, model i ngjashëm me atë të energjisë elektrike, për të centralizuar investimet, burimet dhe menaxhimin në këtë sektor, që sipas tij është ende i fragmentarizuar dhe joefikas.

“Duhet të kalojmë në nivel kombëtar për çështjet e ujit dhe menaxhimit të mbetjeve. Nuk mund të presim më gjatë për të pasur rezultate konkrete,” përfundoi Rama.