Në një takim me emigrantët shqiptarë në Milano, kryeministri Edi Rama dha lajmin se qeveria italiane ka firmosur dokumentin e fundit për njohjen e pensioneve, duke përmbyllur një proces të gjatë që, sipas tij, u arrit me ndihmën e kryeministres italiane Giorgia Meloni, të cilën e quajti “motra ime në Romë”.

Rama theksoi rëndësinë që do të kishte anëtarësimi i Shqipërisë në Bashkimin Evropian, jo vetëm për përfitime shtetërore, por për të barazuar të drejtat e qytetarëve shqiptarë me ato të qytetarëve evropianë:

“Me hyrjen në BE, mundësitë tona për të mbështetur njerëzit do të jenë shumë më të mëdha. Pasaporta europiane nuk është një dokument udhëtimi, por një status qytetarie. Me atë pasaportë, do të kemi të njëjtat të drejta si çdo italian.”

Ai foli edhe për sfidat që emigrantët kanë përballuar ndër vite dhe për përpjekjet e qeverisë shqiptare në çështjen e pensioneve:

“Ne bëmë një përpjekje shumë të gjatë që më në fund qeveria italiane t’i njihte pensionet tuaja. Dhe ju pritët gjatë. Edhe pasi u morëm vesh me motrën time në Romë, ju prapë pritët, derisa u miratua ligji dhe vetëm tre ditë më parë u firmos dokumenti i fundit.”

Rama përfundoi fjalën me një reflektim:

“Nëse do të kishim pasaportën e BE, ju nuk do të kishit pasur nevojë për asnjë njohje nga qeveria italiane.”