Nga Konferenca për Rindërtimin e Ukrainës që po mbahet në Romë, kryeministri Edi Rama theksoi edhe një herë angazhimin e Shqipërisë për të qëndruar krah Ukrainës në përpjekjen e saj për rimëkëmbje pas agresionit rus.

“Në çdo moment që Ukraina ka nevojë për ne, ne do të jemi aty. Kemi qenë dhe do të jemi përkrah Italisë dhe partnerëve tanë evropianë në këtë përpjekje,” – deklaroi Rama gjatë fjalës së tij.

Kryeministri vlerësoi gjithashtu mikpritjen dhe sigurinë që ofron Italia për evente të tilla të rëndësishme ndërkombëtare. “Roma është një vend i sigurt. Tani për tani, nuk ka vend më të sigurt se Italia, me të gjitha protokollet e saj të sigurisë,” tha Rama, duke përmendur me humor se truprojat e presidentit Zelensky ishin “të padobishëm” në këtë ambient të sigurt, pasi “ne ndihemi të mbrojtur.”

Rama nënvizoi gjithashtu kontributin e Shqipërisë në ndihmë të Ukrainës, duke theksuar se Tirana ka mobilizuar burime dhe mbështetje konkrete për Kievin, dhe se angazhimi do të vijojë.

“Ne do të jemi gjithmonë në krahun e tyre, dhe në krahun tuaj,” – përfundoi Rama, duke e pozicionuar Shqipërinë qartë në linjën pro-ukrainase të partnerëve evropianë në këtë kohë krize.