Kryeministri Edi Rama sulmoi Organizatën e Kombeve të Bashkuara gjatë takimit inaugurues të Bordit të Paqes, duke e quajtur “gjigant në agoni” dhe duke e vlerësuar çdo iniciativë që mund ta rikthejë në funksion. “Shumë në BE thonë se Bordi i Paqes synon të zëvendësojë Kombet e Bashkuara, por mua nuk më duket si një përpjekje për të zëvendësuar Kombet e Bashkuara, por nëse ndihmon ta shkundë atë gjigant në agoni dhe, dashtë Zoti ta zgjojë, atëherë Zoti e bekoftë Bordin e Paqes”, tha Rama.

Rama konfirmoi pjesëmarrjen e Shqipërisë me trupat e saj në forcën ndërkombëtare të stabilizimit në Gaza, ndërsa nuk i kurseu komentet për ish-krerët e UÇK-së në Hagë. Ai kujtoi arrestimin e ish-presidentit të Kosovës, Hashim Thaçi, përpara udhëtimit drejt Shtëpisë së Bardhë për të nënshkruar marrëveshjen me Serbinë:

“Presidenti i Kosovës u ndalua të udhëtonte drejt Shtëpisë së Bardhë në mënyrë brutale për të nënshkruar marrëveshjen, dhe kjo u bë nga ai prokuror vrasës që përndoqi edhe vetë presidentin Trump dhe për këtë u bë i famshëm botërisht. Sot, presidenti i Kosovës ka kaluar gjashtë vjet në paraburgim nga një gjykatë e posaçme në Hagë, sponsorizuar nga disa shtete demokratike, disa prej tyre të pranishme këtu, që duhet t’u vijë turp nga ajo lloj drejtësie ndërkombëtare” – tha Rama.

Ai bëri thirrje për veprime para se të ndodhin “gjëra shumë të këqija” dhe falenderoi administratën Trump për përfshirjen e Shqipërisë në këtë nismë ndërkombëtare:

“Shpresoj fort që Shqipëria është një vlerë e shtuar e vizionit tuaj të jashtëzakonshëm” – shtoi ai.

Takimi u shënua edhe nga një rivalitet i dukshëm mes Ramës dhe Vjosa Osmanit, presidentes së Kosovës, gjatë përpjekjeve për të tërhequr vëmendjen e Donald Trump. Rama ishte i pari që hyri në skenë për të kapur çastin, por Osmani iu përgjigj shpejt, duke sfiduar për pak çaste “madhështinë” e shfaqur të kryeministrit shqiptar. Situata u perceptua si një lojë taktike për të fituar vëmendjen e presidentit amerikan, por edhe për të shfrytëzuar ndikimin personal në marrëdhëniet ndërkombëtare.

Ky takim theksoi përpjekjet e Shqipërisë për të luajtur rol aktiv në nismat ndërkombëtare të paqes, por edhe sfidat e diplomacisë rajonale dhe rivalitetet personale mes liderëve të Ballkanit.