Kryeministri Edi Rama ka mbledhur pasditen e sotme në Pallatin e Brigadave në Tiranë deputetët socialistë të listës së hapur dhe të mbyllur të zgjedhjeve të 11 majit, në një takim të rëndësishëm pas përfundimit të procesit zgjedhor. Në këtë mbledhje, Rama ka paralajmëruar ndryshime të rëndësishme në udhëheqjen e Partisë Socialiste dhe në qeveri, duke e konsideruar këtë moment si një fazë të re për maxhorancën.

Në fjalën e tij, Rama theksoi se “duhet të bëjmë disa lëvizje në udhëheqjen e partisë dhe në qeveri”, duke shtuar se mirëkuptimi i brendshëm është thelbësor për përdorimin e “fuqisë së mandatit të katërt” në mënyrë strategjike.

“Kemi garantuar drejtësinë, forcuar sigurinë, rritur reputacionin dhe kemi bërë histori me vendin tonë brenda kësaj dekade.
Kemi mësuar se për t’i arritur këto suksese, duhet një punë e madhe me veten,” – tha kryeministri.

Ai shtoi se ndryshimet e pritshme janë pjesë e një riorganizimi të nevojshëm për të përmbushur objektivat e reja dhe për të përforcuar aleancat strategjike, veçanërisht me “familjen tonë europiane”, siç u shpreh.

Kjo deklaratë e Ramës vjen në një moment kur në opinionin publik janë rritur spekulimet për ndryshime në kabinetin qeveritar dhe ristrukturim të Partisë Socialiste pas zgjedhjeve të fundit. Lëvizjet e paralajmëruara pritet të shënojnë jo vetëm një riformatim organizativ, por edhe një shtrirje të re të kontrollit dhe përgjegjësive brenda strukturave të PS-së dhe ekzekutivit.