Kryeministri Edi Rama ka reaguar mbi marrjen në hetim të deputetes Klotilda Bushka në lidhje me dosjen e arrestimit të kryebashkiakut të Tiranës, Erion Veliaj.

Gjatë një takimi të jashtëzakonshëm me Grupin Parlamentar të PS, Rama tha se edhe ai, ashtu si të gjithë anëtarët e grupit, është i befasuar nga përfshirja e Bushkës në këtë çështje.

“Ky është një takim jashtë radhe i Grupit me kërkesë të kryetares së Komisionit të Ligjeve, gjë që e kemi pranuar për faktin se të gjithë jemi të befasuar që kryetarja e Komisionit figuron në atë aktakuzë për kryetarin e Bashkisë dhe bashkëshorten e tij. Ndërkohë që kryetarja e Komisionit të Ligjeve e ka marrë vesh për përfshirjen e saj në këtë aktakuzë si person i dyshuar nga televizori, as nuk është thirrur, as nuk është pyetur dhe as nuk është dëgjuar,” u shpreh Rama.

Reagimi i kryeministrit vjen në një moment të tensionuar politik, ndërsa SPAK vijon hetimet për çështjen Veliaj dhe ndikimet e mundshme politike në proceset ligjore dhe administrative.