Kryeministri Edi Rama ka vijuar takimet me qytetarët e Tiranës, këtë herë në kuadër të një dëgjesë për buxhetin e vitit 2026, ku foli për prioritetet e qeverisë dhe dëgjoi shqetësimet e banorëve.

Një fokus i veçantë i takimit ishte Spitali Onkologjik, ku për herë të parë do të krijohet një fond i posaçëm për barnat e pacientëve me kancer. Rama garantoi se kjo masë do të eliminojë mungesat e medikamenteve dhe do të parandalojë çdo përfitim të paligjshëm nga personeli mjekësor, duke iu referuar skandalit të regjistruar një vit më parë në spital.

“Ajo që ndodhi në Spitalin Onkologjik ishte tronditëse, por transformimi është i dukshëm. Ilaçet janë shumë të shtrenjta, dhe në buxhetin e 2026 kemi vendosur për herë të parë një fond të posaçëm për barnat për kancerin. Kjo do të thotë që njerëzit që shkojnë atje të mos kenë mungesë dhe të mos përfitojë askush siç ndodhi më parë,” tha Rama.

Ai shtoi se përpara vendosjes së këtij fondi, qeveria kishte dashur të rrisë pensionet dhe të mbulojë gjithë barnat, por kushtet fiskale nuk e kishin lejuar plotësisht këtë. Fondi i ri shënon një hap të rëndësishëm drejt përmirësimit të kujdesit shëndetësor dhe transparencës në spitalin Onkologjik.