Tiranë – Kryeministri dhe kryetari i Partisë Socialiste, Edi Rama, prezantoi sot programin e ri qeverisë gjatë Asamblesë së PS-së, duke theksuar se ky mandat i katërt i mazhorancës për Shqipërinë 2030 është më i qartë dhe më konkret se kurrë.

Rama theksoi se misioni i integrimit në Bashkimin Europian nuk ka qenë kurrë më i pasqyruar në programin qeverisës:
“Detyra jonë si mazhorancë nuk ka qenë kurrë më e qartë se në këtë mandat të katërt. Të mbyllim negociatat brenda 27 muajve, të mundësojmë ratifikimin në 27 parlamentet e vendeve anëtare dhe të ngremë flamurin e Skënderbeut dhe Ismail Qemalit në Bruksel deri në fund të dekadës.”

Ai shtoi se këto nuk janë thjesht tre stacione, por tre “maja” që duhet kapur njëra pas tjetrës, duke u bazuar në punën, durimin dhe vendosmërinë e 400 e kusur njerëzve të pranishëm në sallë.
“Yjet e fatit janë rreshtuar si kurrë asnjëherë në favor të Shqipërisë,” theksoi Rama, duke nënvizuar optimizmin për të ardhmen europiane të vendit.

Programi i ri qeverisës synon të konkretizojë objektivat strategjike për vendin, duke e vendosur integrimin europian dhe zhvillimin ekonomik në qendër të politikave të mandatit të ardhshëm.