Kryeministri Edi Rama ka komentuar vendimin e Gjykatës së Apelit për dënimin e deputetit demokrat Ervin Salianji me një vit burg, duke e cilësuar atë si një dënim të ligjshëm për veprimtarinë e tij dizinformuese, deri në formën kriminale të kallzimit të rremë. Rama theksoi se ky vendim nuk do të ndalë aktivitetin e asaj që e quajti “kancer i shpifjes” që helmon përditë shoqërinë shqiptare, por e konsideroi si një ditë të mirë për të vërtetën.

“Pas 34 vjetësh sovraniteti të pakufizuar si një shtet brenda shtetit, Mbretëria e vetëshpallur e shpifarakëve ka cënuar mijëra jetë njerëzish dhe ka ndotur përditë mjedisin publik të Shqipërisë. Kjo është bërë përmes abuzimit ekstrem me lirinë e fjalës dhe triumfit të lirisë së shpifjes,” tha Rama. Ai shtoi se gjatë kësaj periudhe, shumë individë kanë abuzuar me lirinë e fjalës, duke shkaktuar dëme të mëdha në shoqëri.

Rama përmendi se në vendin tonë, për 34 vjet, ka pasur shumë raste të gjyqeve për shpifje ndaj politikanëve, të cilat zgjatën me vite dhe shpesh përfunduan me dënime simbolike për shpifësit. Ai e përshkroi vendimin e sotëm si një ushtrim të së drejtës së sanksionuar në ligj për dënimin penal të shpifjes dhe kallzimit të rremë, duke u fokusuar në një ngjarje të mëparshme që tronditi opinionin publik.

“E vërteta vonoi shumë, por më në fund nuk harroi të vinte. Ky vendim do të ndihmojë në ndalimin e shpifjeve që kanë prekur rëndë shoqërinë,” tha Rama. Ai theksoi se qeveria socialistëve ka hequr dorë prej vitesh nga çdo gjyq për shpifje kundër gazetarëve, por nuk do të heqin dorë nga proceset gjyqësore ndaj atyre që shpifin në mënyrë të paligjshme.

“Padiskutim që kjo është një luftë e pabarabartë, por ne nuk do ta pranojmë kurrë Mbretërinë paralele të shpifarakëve si një pasojë fatale të bashkëjetesës në një shtet demokratik,” përfundoi Rama, duke shprehur angazhimin e tij për të mbrojtur të vërtetën dhe për të luftuar shpifjen në çdo formë.