Në prezantimin e buxhetit 2022 për Ministrinë e Shëndetësisë, kryeministri Edi Rama ka folur për revolucionin digjital duke thënë se kanë pasur një takim me partner të huaj për të kontribuar financiarisht.
Rama theksoi se ka ende gjëra për të përmbushur në shëndetësi, ndërsa thumboi opozitën duke thënë se në 25 vjet nuk u shtua asgjë e qëndrueshme dhe ngriti pyetjen nëse janë shumë 8 vjet për tu realizuar të gjitha nevojat.
“Që nga infrastruktura kritike e sistemit deri tek mbështetja, sot paradite kishim një takim partnerësh të huaj që duan të kontribuojnë më shumë financiarisht për të gjithë revolucionin tonë digjital dhe ishin me ne për shkak të ndjekjes së ecurisë dhe kalimit të Shqipërisë nga vendi i fundit në rajon. Si do të mund të përballohej zinxhiri i infektimeve nëse për të dalë nga shtëpia, njerëzit duhet të merrnin leje në sportel?
Për ne është e nevojshme në mënyrë që të jemi të qartë se ku duam të shkojmë dhe nuk ka fjalë më të urtë se për atë që shkojnë lart dhe sa më lart të shikosh, aq më larg do shkosh përpara. Sot ne jemi në kushtet kur po rindërtojmë dhe po zgjerojmë, plus me një sistem pajisjesh të fjalës së fundit, struktura kritike të sistemit tonë, spitalin e ri të sëmundjeve të brendshme, të pediatrisë, maternitetin Mbretëresha Geraldinë, spitalin pediatrik në Elbasan, rajonalin në Kukës dhe të gjitha këto kantiere që janë në proces ose drejt përfundimit do të shtrojnë një fuqi të re të sistemit.
Nuk do ta përmbushim të gjithë nevojën për fuqi të sistemit sepse ka akoma pjesë të tjera pëer të shtruar, por të gjithë infrastrukturën kritike të sistemit. A janë shumë 8 vjet për tu bërë të gjitha këto? Varet si e shohim. Por nëse 25 vjet nuk ishin shumë dhe në 25 vjet jo që nuk u shtua gjë e qëndrueshme por u shtua vit pas viti ndjesia e ecjes së mbyllur dhe e degradimit, në 8 vjet, vendosja e gjithë këtyre bazave të rëndësishme për sistemin, tregojnë për një maksimizim të kohës”, tha Rama.
