Kryeministri i vendit Edi Rama ka zhvilluar sot takim me fermerët në Tropojë.

Rama u shpreh se qeveria e tij ka investuar shumë për turizmin e këtij qyteti dhe vetëm këtë vit Tropojën e kanë vizituar mbi 150 mijë turistë. Ai tha ndër të tjera se paçka nuk ka marrë votën në këtë zonë, qeveria do kryejë një sërë investimesh për zhvillimin ekonomik.

Rama: Si kudo, edhe këtu programi i “Rilindjes Urbane” i ka hapur rrugë një zhvillimi të turizmit që deri dje ishte një dëshirë e bazuar te mrekullitë e natyrës pa asnjë kontribut të qeverisë. Në këtë zonë ne nuk jemi mbështetur me votë në mënyrë të shpeshtë, ne kemi bërë atë që të gjitha qeveritë e tjera sëbashku nuk e kanë bërë. Punë dhe investime, që kanë ndryshuar frymën, ngjyrën dhe fuqinë tërheqëse të qytetit. Këtë vit në Tropojë mbi 150 mijë vizitorë vendas dhe të huaj. Ambicia jonë është që këta vizitorë të qëndrojnë gjatë. 2700 hektarë t pyllit të gështenjave i janë dhënë bashkisë, që të bëjë ndarjen sipas atyre marrëveshjeve që janë në territor. Ndarje në funksion të shfrytëzimit. Bashkia do ta administrojë çështjen e pronave.

Përpunimi i boronicave, kthimi i tyre në reçel, është realitet i ri që duhet ekspozuar. Mediat për zonën tuaj vetëm lajme të këqija kanë publikuar, ndërkohë këtu ka njerëz që me vështirësi ja dalin të sigurojnë të ardhura. Puna e dorës mund të kthehet hap pas hapi në një mënyrë për të siguruar të ardhura të larta, asaj nuk i humbet asnjëherë vlera.

Më bëri shumë përshtypje një artikull i një gazetareje britanike që thoshte vetëm vendet diktatoriale vënë në diskutim lirinë e njerëzve për të ikur apo për të ardhur. Shqipëtarët sot po bëjnë atë thoshte që bota e ka bërë që në lindje të saj, po bëjnë atë që sot e bëjnë dhe njerëz të Britanisë që jetojnë në zona të vështira dhe shkojnë në Londër.

Nuk është e drejtë tu thuhet njerëzve rrini këtu, mos ikni, janë në të drejtën e tyre të marrin vendimin e tyre sepse shyqyr zotit nuk jemi në bunkerin e komunizmit, nga ana tjetër sot është fakt që në Shqipëri nëse do t’i krijosh vetes mundësi ja krijon. Në fshat sidomos janë të pafundme. Nëse në Tropojë sot vijnë 150 mijë turistë, do të thotë që ka një treg për këdo që jeton në fshat, me shtëpinë e vjetër dhe tokën rreth e rrotull ke mundësi ta kthesh në pikë që tërheq disa prej tyre.