Kryeministri Edi Rama ka shprehur pakënaqësi ndaj zvarritjes së procesit për përcaktimin e zonave ku mund të investohet sipas paketës së re të tokës, duke iu drejtuar drejtpërdrejt kryetarit të bashkisë së Kukësit.

“Njerëzit e kanë tokën, por s’kanë dokumentet që e vërtetojnë në letër. Bëmë ligjin 20/20 për ta adresuar këtë problem, por ajo që duhet tani është hapi juaj – të përcaktoni zonat ku mund të hapet rruga për investime, përveç atyre që janë zona të mbrojtura,” u shpreh Rama.

Ai theksoi se procesi është bllokuar nga mungesa e hartave të zonave, duke shtuar me tone ironike:
“Do ju lutesha shumë që të përcaktoni zonat, duke përfshirë sa më shumë territore… Më dëgjon ti kryetari i bashkisë së Kukësit? Më dëgjon?! Por s’e di nëse më kupton!”

Rama theksoi se një nga shtysat kryesore të kësaj pakete janë kuksianët në emigracion, të cilët kanë treguar interes të madh për të investuar në vendlindje.
“S’ka arsye pse njerëzit të presin, pesë muaj i keni pasur të gjitha instrumentet në dispozicion,” përfundoi ai.