Në seancën parlamentare të kësaj të enjteje pritet të votohen në parlament raportet e Këshillit të Mandateve për heqjen ose jo të mandatit të deputetit të ministres së Jashtme Olta Xhaçka. Drejtuesja e seancës, Ermonela Felaj rrëzoi kërkesën e disa deputetëve të PD-së të cilët kërkuan debat në parlament përpara votimit të raporteve për mandatin e ministres.

Nga ana tjetër deputetja e PD-së, Albana Vokshi e cilësoi këtë vendim si një përpjekje për t’i mbyllur gojën opozitës dhe për të mbrojtur ministren Xhaçka që në kundërshtim me Kushtetutën është kthyer dhe në investiture strategjike.

“Këshilli për mandatet ka vepruar me dy raporte, raportin e shumicës dhe raportin e pakicës, të cilat do të diskutohen në pikën 7 të rendit të ditës dhe më pas do të votohet për secilin prej tyre. Për të gjithë precedentët e mëparshëm nuk ka pasur debat. Kërkesa për zhvillimin e debatit për pikën 7 të rendit të ditës nuk do të pranohet”, tha Felaj.

Albana Vokshit: Ishte e pritshme që ju të mos e pranonin debatin se do t’i mbroni deri në fund ministrat tuaj që janë kthyer dhe në investitor strategjik. Ajo që ju po bëni është që po tentoni t’i mbyllni gojën opozitës. Nuk e keni bërë vetëm në Kuvend, por dhe në komisione parlamentare, na keni hequr të drejtën e fjalën ne debutetëve, por dhe grupeve të interesit. Keni frikë nga fjala ndaj dhe ajo që bëni ju është që shkelni në mënyrë të vazhdueshme Kushtetutën dhe rregulloren, përdorni arrogancën e votave për të mbrojtur ministrat tuaj.