Një rast i fruthit u konfirmua sot në Shqipëri, duke ngritur shqetësime për përhapjen e mundshme të këtij infeksioni viral shumë ngjitës. Viktimë është një fëmijë i pavaksinuar, i cili ka mbërritur nga Britania e Madhe dhe më 22 dhjetor është paraqitur për trajtim mjekësor. Ai ndodhet nën kujdes të shërbimit pediatrik infektiv, ndërsa Instituti i Shëndetit Publik po monitoron situatën dhe deri tani nuk ka të dhëna për raste të tjera.

Fruthi transmetohet lehtësisht përmes ajrit ose kontaktit të afërt me personin e infektuar. Simptomat përfshijnë temperaturë të lartë, kollë të thatë, rrjedhje hunde, sy të skuqur e të lotuar dhe njolla të bardha brenda gojës, të cilat shfaqen para skuqjes së lëkurës që zakonisht fillon nga fytyra dhe përhapet në trup.

Autoritetet shëndetësore bëjnë thirrje për vaksinimin e fëmijëve sipas kalendarit të imunizimit, duke theksuar se vaksina MMR është mënyra më e sigurt për parandalimin e fruthit, shytave dhe rubellës. Doza e parë rekomandohet në 12–15 muaj, ndërsa doza e dytë në moshën 4–6 vjeç, me mundësinë e administrimit më herët në raste shpërthimesh.