Një ngjarje e rëndë ka tronditur sot qytetin e Pejës, ku një grua është vrarë me armë zjarri në orët e mëngjesit. Sipas raportimeve nga mediat lokale, autori i dyshuar i krimit është bashkëshorti i viktimës, i cili është tashmë në pranga.

Zëdhënësi i Prokurorisë Themelore në Pejë ka konfirmuar për mediat se i dyshuari u arrestua menjëherë pas ngjarjes dhe se arma përdorur në krim është konfiskuar nga autoritetet. Gjithashtu, është bërë me dije se pritet mbërritja e ekipeve nga Instituti i Mjekësisë Ligjore për të marrë trupin e viktimës.

Ky incident vjen vetëm pak ditë pas një tjetër rasti të dhunës fatale ndaj grave në Kosovë. Më 12 prill, një vajzë 21-vjeçare u vra brenda ambjenteve të Qendrës për Punë Sociale në Ferizaj, duke rritur shqetësimet për sigurinë dhe mbrojtjen e grave në vend.

Këto raste të vazhdueshme të dhunës ndaj grave po ngrenë alarmin për nevojën urgjente të adresimit të kësaj çështjeje në nivelin më të lartë të politikëbërjes dhe zbatimit të ligjit në Kosovë.