Presidenti amerikan Donald Trump është përballur me kritika të ashpra nga qarqet e sigurisë kombëtare, pas vendimit për të emëruar një 22-vjeçar pa përvojë, Thomas Fugate, në krye të njërit prej programeve më të ndjeshme të Departamentit të Sigurisë Kombëtare (DHS): Qendra për Parandalimin e Dhunës së Targetuar dhe Terrorizmit.

Fugate, i diplomuar vetëm një vit më parë në Universitetin e Texasit në San Antonio, ka marrë drejtimin e një programi me buxhet mbi 18 milionë dollarë, që ka për detyrë identifikimin dhe parandalimin e radikalizmit dhe sulmeve të brendshme terroriste në SHBA. Para këtij emërimi, ai kishte punuar si kopshtar, ndihmës në një market dhe pjesëmarrës në organizata konservatore si Heritage Foundation, si dhe në fushata politike të Trump.

Ekspertët e sigurisë e kanë quajtur vendimin “absurd dhe të rrezikshëm”, duke e krahasuar me “vendosjen e një praktikanti në një rol me përgjegjësi jetike”. “Kjo minon profesionalizmin dhe besimin te institucionet federale të sigurisë,” u shpreh për ProPublica një ish-zyrtar i lartë i DHS.

Nga ana e saj, administrata Trump ka mbrojtur vendimin, duke e cilësuar Fugate si një “zë të ri konservator me potencial të madh”, por kritikët paralajmërojnë pasoja të rënda për sigurinë publike, për shkak të mungesës së përgatitjes profesionale dhe përvojës në çështje komplekse si lufta kundër terrorizmit të brendshëm.