Grupi Parlamentar i Partisë Demokratike (PD) ka reaguar me forcë pas vendimit të papritur të Kuvendit për të shtyrë seancën e planifikuar për sot, më 10 tetor 2024, një vendim që përkon me vizitën e presidentit turk, Recep Tayyip Erdogan, në Tiranë. Sipas PD-së, ky anulim nuk është konsultuar me grupet parlamentare dhe është bërë në mënyrë të njëanshme nga Kryetarja e Kuvendit, Elisa Spiropali.
Në deklaratën e tyre, PD akuzon Spiropalin për shkelje të Kushtetutës dhe Rregullores së Kuvendit, duke e ironizuar atë se Kuvendi është trajtuar si “qelia personale e Pëllumb Gjokës”, duke nënkuptuar që ai hapet dhe mbyllet sipas dëshirës së saj, për shkak të lidhjeve me pushtetin. PD thekson se Kuvendi është një institucion kushtetues dhe çdo ndryshim në planifikimin e punimeve duhet të kalojë nëpër procedura të rregullta parlamentare dhe të miratohet nga Konferenca e Kryetarëve.
“Kuvendi i Shqipërisë është institucion kushtetues, që funksionon sipas Kushtetutës dhe Rregullores së Kuvendit. Seanca plenare dhe plani i punës së Kuvendit miratohen nga Konferenca e Kyetarëve me mirëkuptim apo nga seanca plenare, që ka përcaktuar me vendim se dita e enjte, datë 10 Tetor 2024, është ditë për mbledhjen e Kuvendit në seancë plenare. Kryetarja e Kuvendit ka vetëm detyrimin për të caktuar çështjet qe trajtohen, pra Rendin e Ditës. Anullimi i seancës me vendim personal të Elisa Spiropalit është antikushtetues dhe bie ndesh me çdo parim demokratik të funksionimit të Parlamentit. Kuvendi nuk është qelia personale në burg e Pëllumb Gjokës, që për shkak të lidhjeve me pushtetin, ai e hap e mbyll sa herë dëshiron. Kuvendi është tempulli i përfaqësimit të qytetarëve, që nuk mund të trajtohet kurrë si qelia e Pëllumb Gjokës. Grupi Parlamentar i Partisë Demokratike dënon me forcë sjelljen e Kryetares së Kuvendit Elisa Spiropali, që hap e mbyll punimet e Kuvendit, pa asnjë konsultim, pa ndjekur asnjë rregull, duke shkelur Kushtetutën dhe Rregulloren e Kuvendit, dhe duke e shndërruar zyrtarisht Parlamentin e Shqipërisë në qelinë personale në burg ku strehohet Pëllumb Gjoka apo të ngjashmit e tij”, thuhet në reagimin e PD.
