Pas publikimit të dy videove nga kandidati i Partisë Demokratike për Korçën, Edmond Spaho, ku pretendohej se një kandidat i Partisë Socialiste kishte ofruar para në këmbim të votave në fshatin Podgorie-Maliq, Policia e Korçës ka dalë me një reagim zyrtar duke hedhur poshtë akuzat për shitblerje votash.

Sipas njoftimit të policisë, nga analiza e videove nuk u konstatuan veprime të kundërligjshme që lidhen me korrupsion elektoral. Përkundrazi, është proceduar penalisht shtetasi A.P., 34 vjeç, i cili sipas autoriteteve ka kryer regjistrimin, por ka refuzuar të dorëzojë pajisjen për ekspertizë, duke u akuzuar për “veprime që pengojnë zbulimin e së vërtetës”.

Policia bëri të ditur se A.P. është person me precedentë penalë, i dënuar më herët për vepra penale në fushën e narkotikëve dhe krimeve kundër personit. Ai është identifikuar si autori i regjistrimeve dhe si personi që ka penguar hetimin duke mos bashkëpunuar me organet ligjzbatuese.

“Nuk rezulton ndonjë veprim i kundraligjshëm nga ana e kandidatit të PS-së A.J., ndërsa materialet janë referuar Prokurorisë së Korçës për veprime të mëtejshme,” thuhet në komunikatën zyrtare.

Kjo ngjarje ka sjellë polemika në ditët e fundit të fushatës, me Spahon që ka akuzuar PS-në për manipulime zgjedhore, ndërsa reagimi i policisë vjen si një refuzim institucional i këtyre pretendimeve, duke vendosur në fokus vërtetësinë e provave dhe pengimin e drejtësisë nga personi që kreu regjistrimin.