Seanca e sotme plenare u shoqërua me tone të ashpra dhe replika të forta, ku në qendër të debatit ishte figura e Endrit Shabanit, kandidat për Avokat të Popullit. Deputeti i “Lëvizja Bashkë”, Redi Muçi, akuzoi të dy kampet politike—Partinë Demokratike dhe Partinë Socialiste—për atë që e quajti “pazari i radhës politik”.

Muçi, me tone ironike, tha se Parlamenti po humb kohë duke debatuar për një figurë, të cilën deri më dje vetë Shabani e paraqiste si kundërshtar të sistemit politik ekzistues.

“Zoti ministër foli për seriozitet, por nuk ka asgjë më qesharake se 120 minuta sherre për Endri Shabanin,” deklaroi ai nga foltorja. “Një njeri që deri më parë i binte gjoksit si tribuni i partive të reja kundër sistemit të kalbur politik, sot na del Avokat i Popullit me firmat e PD dhe votat e PS.”

Duke iu drejtuar demokratëve, Muçi ngriti pyetjen se përse e kanë akuzuar Shabanin si “lepur i Surrelit”, ndërsa njëkohësisht i kanë dhënë firmat për kandidaturën e tij. Ndërsa për socialistët, ai shtroi akoma një dilemë tjetër: “Si e ëmbëlsuat Endrit Shabanin… ose më mirë, si iu ëmbëlsoi ai juve që po e zgjidhni Avokat të Popullit?”

Deklarata e Muçit erdhi në një moment kur tensionet mes mazhorancës dhe opozitës janë rritur lidhur me procesin e përzgjedhjes së Avokatit të Popullit, një institucion që ka mbetur pa drejtues të mandatuar prej më shumë se një viti.