Forcat speciale RENEA, të mbështetura nga njësitë Operacionale, zhvilluan sot një aksion të befasishëm në zonat e Dobraçit dhe Fushë-Kuqes, në kuadër të një operacioni të drejtuar nga prokurorët e SPAK-ut.

Si rezultat i kontrollit të gjerë, në pranga ranë Elvin Mërlika, kushëri i të shumëkërkuarit Ervis Martinaj, dhe Fred Xhixha, vëllai i Besian Xhixhës.
Burime nga hetimi bëjnë të ditur se Elvin Mërlika akuzohet për “Sigurimin e kushteve dhe mjeteve materiale për të kryer vrasje”, në dëm të Indrit Dokles, si dhe për pjesëmarrje në një grup të strukturuar kriminal.

Gjatë operacionit, RENEA kreu kontrolle të njëpasnjëshme edhe në qytetin e Shkodrës, ku hynë në banesën e Eljo Hatos dhe në disa shtëpi të tjera në lagjen “Dobraç”, në kërkim të provave shtesë dhe personave të tjerë të dyshuar.

Operacioni konsiderohet një prej goditjeve më të rëndësishme të javëve të fundit ndaj grupeve kriminale që operojnë në veri të vendit, ndërsa hetimet e SPAK pritet të vijojnë me arrestime të tjera.