Një zbulim shkencor i publikuar së fundmi po ngjall shpresa të mëdha për miliona persona që jetojnë me diabet. Një ekip ndërkombëtar hulumtuesish, i udhëhequr nga inxhinieri izraelit Shady Farah dhe në bashkëpunim me universitete prestigjioze amerikane, ka zhvilluar një pajisje inovative që mund të zëvendësojë injeksionet e përditshme të insulinës.

Studimi, i botuar në revistën shkencore “Science Translational Medicine”, prezanton një implant qelizor autonom që funksionon si një “mushkëri artificiale”. Pajisja monitoron në mënyrë të vazhdueshme nivelet e glukozës në gjak, prodhon insulinë brenda trupit dhe e çliron atë në sasinë e saktë që organizmi ka nevojë, pa pompa, pa injeksione dhe pa ndërhyrje nga pacienti.

Një nga risitë më të rëndësishme të kësaj teknologjie është e ashtuquajtura “mburojë kristaline”, e cila mbron implantin nga sulmet e sistemit imunitar. Kjo zgjidh një problem madhor që ka penguar terapitë qelizore për dekada dhe mundëson funksionimin e implantit për periudha afatgjata.

Testimet laboratorike tek minjtë treguan një rregullim efektiv dhe të qëndrueshëm të glukozës në gjak, ndërsa studimet tek primatët jonjerëzorë konfirmuan se qelizat brenda implantit mbeten të gjalla dhe funksionale për një kohë të gjatë. Këto rezultate hapin rrugën për testime klinike te njerëzit.

Përtej diabetit, studiuesit theksojnë se kjo platformë mund të përdoret edhe për trajtimin e sëmundjeve të tjera kronike, si hemofilia apo çrregullime metabolike dhe gjenetike, duke ofruar terapi biologjike të vazhdueshme brenda trupit.

Nëse teknologjia rezulton e suksesshme në përdorim klinik, ekspertët vlerësojnë se ajo mund të transformojë rrënjësisht mënyrën se si trajtohen sëmundjet kronike, duke zëvendësuar trajtimet e përjetshme me zgjidhje të vetërregulluara dhe afatgjata.