Kompania amerikane e teknologjisë Nvidia ka hyrë sot në histori, duke u bërë kompania e parë në botë që arrin një vlerë tregu mbi 5 mijë miliardë dollarë (5 trilionë). Ky është një moment historik për tregjet financiare globale dhe një dëshmi e fuqisë së rritjes së industrisë së inteligjencës artificiale (AI).

Sipas The Guardian, rritja e jashtëzakonshme e vlerës së Nvidia-s është pjesë e një trendi më të gjerë që ka përfshirë kompanitë teknologjike, të nxitura nga pritjet për ulje të normave të interesit nga Rezerva Federale e SHBA-së, me rreth 0.25%.

Aksionet e Nvidia-s u rritën me 5%, pas lëvizjeve strategjike të drejtorit ekzekutiv Jensen Huang, i cili siguroi porosi për çipa AI me vlerë 500 miliardë dollarë dhe njoftoi ndërtimin e një superkompjuteri në bashkëpunim me qeverinë amerikane.

Ndërkohë, indekset kryesore të tregjeve amerikane shënuan gjithashtu rritje:
• S&P 500 (teknologjik): +1.4%
• S&P 500 (i përgjithshëm): +0.3%
• Nasdaq: +0.7%
• Dow Jones: +0.6%

Tregjet amerikane kanë arritur nivele rekord ditët e fundit, të mbështetura nga boomi i inteligjencës artificiale, fitimet e forta të korporatave, dhe pritjet për politika monetare më të lehta në muajt në vijim.