Ka përfunduar procesi i numërimit të votave preferenciale për qarkun e Tiranës dhe rezultati ka sjellë një përmbysje surprizë në radhët e Partisë Socialiste. Me vetëm dy vota diferencë, ish-ministrja Olta Xhaçka i ka marrë mandatin Blerina Gjylametit, duke siguruar një vend në Kuvend.
Sipas të dhënave zyrtare të Komisionit Qendror të Zgjedhjeve, Olta Xhaçka ka marrë 5806 vota, ndërsa Blerina Gjylameti 5804 vota – një garë me rezultat jashtëzakonisht të ngushtë që mund të hapë rrugën për ankesa dhe kontestime.
Ndërkohë, kandidati më i votuar në listën e hapur të PS-së në Tiranë është Blendi Gonxhja, i cili ka marrë 22,398 vota, ndjekur nga Erion Braçe me 21,364 vota dhe ministri i Brendshëm, Ervin Hoxha, me 19,113 vota.
Në pozicionet e mëposhtme renditen:
• Fatmir Xhafaj – 12,677 vota
• Ornaldo Rakipi – 9,683 vota
• Anila Denaj – 8,783 vota
Ky rezultat konfirmon jo vetëm konkurrencën e fortë brenda listës së PS-së në Tiranë, por edhe ndikimin e drejtpërdrejtë që votat preferenciale kanë pasur në ndarjen e mandateve, ku edhe dy vota mund të bëjnë diferencën mes hyrjes në Parlament dhe qëndrimit jashtë tij.
