Komisioni Qendror i Zgjedhjeve në Kosovë ka publikuar rezultatet paraprake nga numërimi i 93.02% të fletëvotimeve të hedhura në përfaqësitë diplomatike të Kosovës. Sipas KQZ-së, deri më tani janë numëruar 40 kuti nga 43 të mundshme.

Rezultatet e deritanishme:
Lëvizja Vetëvendosje (në koalicion me Guxo dhe Alternativa) – 80.75%
Partia Demokratike e Kosovës – 7.48%
Lidhja Demokratike e Kosovës – 7.45%
Aleanca për Ardhmërinë e Kosovës – 1.93%

Numërimi i votave ka nisur të mërkurën, në Qendrën e Numërimit dhe Rezultateve në Prishtinë, për 30 përfaqësi diplomatike të Kosovës, të cilat kanë pasur gjithsej 43 vendvotime.

Procesi i votimit
Ky proces u zhvillua më 8 shkurt 2025, ku morën pjesë 15,352 votues, që përbëjnë 75.57% të votuesve të regjistruar për këtë kategori.

Pritet që pas përfundimit të numërimit të fletëvotimeve të mbetura, KQZ të shpallë rezultatet përfundimtare të votës së diasporës, e cila duket se favorizon bindshëm Lëvizjen Vetëvendosje.