Këshilli i Ministrave i Shqipërisë ka miratuar për herë të dytë rishikimin e buxhetit të shtetit për vitin 2024, duke rritur pritshmëritë për të ardhurat me 27 miliardë lekë, bazuar në performancën pozitive të ekonomisë. Sipas Ministrit të Financave Petrit Malaj, kjo rritje e të ardhurave ka çuar totalin e pritshëm për këtë vit në 713.7 miliardë lekë.

Rishikimi i buxhetit parashikon ndarje të reja të fondeve për disa institucione kyçe, duke u fokusuar në sektorët që kanë ndikim të drejtpërdrejtë në jetën sociale dhe zhvillimin ekonomik:

1. Ministria e Bujqësisë: Financimet janë rritur me 500 milionë lekë për skemën e granteve të fermerëve, duke e çuar fondin total të ministrisë në 14.6 miliardë lekë.

2. Ministria e Shëndetësisë: Ka marrë një shtesë prej 200 milionë lekësh, duke e çuar totalin e buxhetit të saj në 78.4 miliardë lekë.

3. Ministria e Brendshme: Bugeti i saj është rritur me 1.3 miliardë lekë, kryesisht për kompensimin ushqimor të policëve dhe për orët shtesë të punës, duke arritur në 27.2 miliardë lekë.

4. Ministria e Arsimit: Ka përfituar 300 milionë lekë për shpërblimin e sportistëve që kanë arritur rezultate të mira, duke e çuar totalin e buxhetit në 52.5 miliardë lekë.

5. Ujësjellës Kanalizimet: Buxheti është rritur me 2 miliardë lekë, duke arritur në 14.6 miliardë lekë.

Sipas Ministrisë së Financave, të ardhurat e arkëtuara deri në fund të korrikut janë rritur me 30.3 miliardë lekë krahasuar me të njëjtën periudhë të vitit të kaluar, falë bumit turistik, shtimit të konsumit dhe rritjes së pagave, sidomos në sektorin e administratës.