Këngëtarja me origjinë shqiptare dhe famë ndërkombëtare, Rita Ora, ka folur së fundmi për marrëdhënien e saj me regjisorin Taika Waititi, duke theksuar se suksesi i martesës së tyre bazohet në respektin e ndërsjellë, mbështetjen për karrierat dhe hapësirën personale.

Në një intervistë për revistën People, 34-vjeçarja u shpreh se:

“Mendoj se gjithçka ka të bëjë me respektin dhe mbështetjen e ndërsjellë në karrierat tona të ndara, projektet dhe hapësirën personale. Të jesh aty për njëri-tjetrin si sistem mbështetjeje, kjo është thelbësore.”

Ora dhe Waititi, 49 vjeç, kurorëzuan dashurinë e tyre në martesë në vitin 2022. Këngëtarja thekson se miqësia e ngushtë që i bashkoi në fillim, ka qenë një bazë e fortë për stabilitetin e lidhjes:

“Të jesh fillimisht shok i ngushtë me dikë është vërtet fantastike.”

Në një tjetër intervistë për podcastin “Begin Again” me Davina McCall, Ora ka ndarë edhe një aspekt më personal të jetës së saj: marrëdhënien e ngrohtë me fëmijët që bashkëshorti i saj ka nga martesa e mëparshme.

“Kaloj më së miri me ta. Jam si kumbara e tyre, u jap gjithë sheqerin dhe akulloret”, tha ajo me humor, duke shtuar se roli si njerkë i jep liri për të “bërë gjëra të çmendura” me ta, pa pasur barrën e rregullave të përditshme.

Ndërkohë, Ora po përjeton një fazë të re edhe në karrierën muzikore. Ajo ka publikuar së fundmi këngën “Heat”, në bashkëpunim me artistin australian Troye Sivan, të cilën e konsideron si një hap përpara në zhvillimin e saj artistik dhe personal.