Krenar Çoçaj, ish-partneri i moderatores së njohur Luana Vjollca, duket se ka nisur një kapitull të ri në jetën personale, këtë herë në krahët e Endi Demnerit, ish-Miss Universe Albania. Dyshja janë fotografuar gjatë pushimeve në Ibiza, në momente intime që konfirmojnë zërat për një romancë të re.

Por, ndërsa faqet rozë raportojnë për idilin e tyre buzë detit, emri i Çoçajt vijon të përmendet në kronikat e zeza.

Biznesmeni, i cili është pronar i kompanisë së transportit “Blue Taxi”, ka qenë i përfshirë në disa ngjarje të bujshme dhe të dyshimta. Ai u dënua me një vit burg, pas një rikualifikimi nga “nxitje për vrasje” në “pjesëmarrje në rrahje”, pas një incidenti të dhunshëm në një club nate.

Në shtator të vitit 2023, një turiste franceze raportoi se ishte ngacmuar seksualisht nga një shofer i një taksie të palicencuar, që operonte nën logon e “Blue Taxi”. Rasti ngjalli shqetësim për mungesën e kontrollit dhe përgjegjësisë në rrjetin e transportit të drejtuar nga Çoçaj.

Një tjetër tragjedi ndodhi kur një automjet i kësaj kompanie përplasi për vdekje një qytetar, 69-vjeçarin Albert Zade, i cili po kalonte rrugën. Ndërsa shoferi u arrestua, lidhja me “Blue Taxi” nuk u përmend zyrtarisht në njoftimin e policisë.

Hetime të mëvonshme kanë zbuluar dyshime për përdorim të automjeteve të kompanisë për trafikim të lëndëve narkotike, përmes një skeme ku shoferët shfrytëzoheshin si korrierë droge, ndërsa përgjegjësitë kryesore tentoheshin të mbuloheshin.

Megjithë këto zhvillime të rënduara, Çoçaj vazhdon të shfaqet në publik në një profil jetese luksoze, tashmë në krah të një emri të njohur si Endi Demneri.

Në një anë i buzëqeshur në plazhet e Ibizës, në tjetrën i ndjekur nga hija e dosjeve penale dhe skandaleve të pazgjidhura, Krenar Çoçaj mbetet një figurë kontradiktore mes showbizit dhe kronikës së zezë.