Djali i Nazmije Mulakut, e cila dyshohet se vrau kunatin e saj Xhevdet Millaku me 10 plumba në lagjen “Kodra e Trimave”, ka dhënë një rrëfim të ndjeshëm lidhur me marrëdhëniet familjare që përfunduan në mënyrë tragjike. Në një intervistë për mediat, ai ka zbuluar detaje të reja që e ndryshojnë perceptimin mbi ngjarjen.

Sipas rrëfimit të tij, raportet midis familjeve ishin të mira dhe të afërta. Ai theksoi se xhaxhai i tij, tani i ndjerë, asnjëherë nuk e kishte kërcënuar nënën e tij, ndryshe nga deklaratat e mëparshme që kishin ardhur në Prokurori.

“Unë qysh nga fëmijëria, jo vetëm unë por edhe vëllai im, raportin me axhin e kemi pasë të shkëlqyer. Prej fëmijërisë, mixha është kujdes gjithmonë ndaj neve. Fillimisht e kemi ndjerë si obligim familjar, e si moral, me qenë afër tij, se ai nuk ka pasë fëmijë. Ma herët kemi jetuar bashkë. Pastaj mixha ka dalë në hyrjen tjetër. Gjithmonë kafen e mëngjesit e kemi pirë bashkë me të. Ai e ka parë që zhurmat që janë krijuar nga nana jonë, nuk ndalen. Ai gjithmonë ka dashtë me i ikë konfliktit,” ka thënë ai.

Në lidhje me pretendimet se axhi i tij kishte kërcënuar nënën e tij, ai është shprehur qartë: “Axhi im asnjëherë nuk e ka kërcënuar nënën time, dhe mbi të gjitha asnjëherë nuk ka tentuar të sulmojë fizikisht nënën time.”

Ky rrëfim vjen në një kohë kur ngjarja është ende nën hetim dhe do të ndihmojë për të qartësuar situatën e ngatërruar që çoi në këtë akt të rëndë.