Një ngjarje e rëndë ka tronditur Italinë, kur një 50-vjeçar, Lorenzo Carbone, ka rrëfyer live në televizion se kishte vrarë nënën e tij, Loretta Levrini, vetëm 24 orë pas krimit. Carbone, i cili ishte në kërkim nga policia për dyshimin se ishte autori i vrasjes, u përball me një gazetar teksa kthehej në shtëpi. Gazetari e ka pritur para derës dhe, gjatë transmetimit live, ai ka bërë të ditur se ishte ai që kishte kryer aktin e tmerrshëm.

“Nuk e di pse e bëra,” ka deklaruar ai, teksa shfaqte pendim të dukshëm. Më tej, Carbone ka treguar me detaje mënyrën se si e kishte mbytur nënën e tij me një lak, duke theksuar se kishte provuar disa metoda të tjera para se të vendoste për këtë akt.

Gruaja e moshuar, Loretta Levrini, u gjet e vdekur nga vajza e saj rreth orës 17:00, gjatë një vizite të zakonshme të fundjavës. Ajo ishte gjetur në shtrat, e mbytur me lak, duket se gjatë mëngjesit të së dielës.

Pas rrëfimit tronditës të Carbone, gazetari ka njoftuar policinë. Autoritetet kanë mbërritur shpejt në vendin e ngjarjes dhe e kanë arrestuar 50-vjeçarin, i cili tani do të përballet me akuzat për vrasje. Kjo ngjarje ka shkaktuar një shqetësim të madh në komunitet dhe ka ngritur pyetje mbi motivet që qëndrojnë pas këtij krimi të rëndë.