Një tjetër akt dhune ka tronditur Nigerinë qendrore, ku persona të armatosur rrëmbyen 28 udhëtarë myslimanë që po udhëtonin drejt një aktiviteti islamik vjetor në shtetin Plateau.

Sipas autoriteteve, autobusi ku ndodheshin viktimat, përfshirë gra dhe fëmijë, u zënë pritë të dielën në mbrëmje ndërsa kalonte mes fshatrave. Zëdhënësi i policisë, Alabo Alfred, njoftoi se forcat e sigurisë janë dislokuar në zonë për të shpëtuar të rrëmbyerit.

Një gazetar lokal raportoi se familjet e viktimave kanë filluar të marrin kërkesa për shpërblim. Policia nuk ka dhënë ende detaje mbi autorët e mundshëm. Sipas BBC, rrëmbimet për përfitim financiar nga bandat kriminale, të njohura si “banditë”, janë bërë fenomen i zakonshëm në veri dhe qendër të Nigerisë.

Ky incident ndodh vetëm një ditë pas lirimit të 130 nxënësve dhe mësuesve të rrëmbyer muajin e kaluar në një shkollë katolike në shtetin Niger. Ndryshe nga kryengritja islamiste në verilindje të vendit, ku grupet xhihadiste operojnë prej më shumë se një dekade, rrëmbimi në Plateau lidhet kryesisht me bandat kriminale që veprojnë për përfitime financiare.