Sulmet kundër emigrantëve rusë dhe ukrainas në Gjermani janë rritur që nga fillimi i pushtimit të Ukrainës.

Ministrja e Brendshme Nancy Faeser tha se që nga fundi i shkurtit, 308 sulme kundër rusëve janë regjistruar nga policia, mes tyre 15 ishin akte dhune.

“Sulmet kundër rusëve dhe objekteve ruse janë në rritje”, tha ajo për Neue Osnabruecker Zeitung.

Rreth 250,000 emigrantë nga Rusia dhe 150,000 nga Ukraina jetonin në Gjermani përpara se Vladimir Putin të niste pushtimin, që ka bërë që më shumë se 300,000 ukrainas të shpërngulen në këtë shtet.

Sulmet kundër ukrainasve janë rritur gjithashtu, tha ministrja Faeser, ku 109 raste janë regjistruar në polici që nga fundi i shkurtit, duke përfshirë 13 akte dhune.

“Ky konflikt nuk duhet të lejohet të depërtojë në shoqërinë tonë”, tha ajo.

“Ne duhet t’u kujtojmë njerëzve se kjo është lufta kriminale e Putinit. Nuk është lufta e njerëzve me origjinë ruse që jetojnë këtu në Gjermani.”