Banka e Shqipërisë ka publikuar të dhënat e fundit për të ardhurat që ekonomia jonë ka përfituar nga turistët në muajt e parë të vitit 2024, duke treguar një rritje të konsiderueshme prej 164 milionë euro krahasuar me vitin e kaluar. Viti 2024 konfirmohet të jetë edhe më optimist përsa i përket turizmit në vend.

Kjo është një shifër shumë inkurajuese, duke marrë parasysh se bëhet fjalë për periudhën janar-mars, një periudhë që zakonisht nuk ka shumë udhëtime dhe është në fillim të sezonit turistik.

Sipas të dhënave të Bankës së Shqipërisë, prurjet e turistëve në tremujorin e parë të këtij viti arritën në 788 milionë euro, nga 624 milionë euro që ishin në të njëjtën periudhë të vitit të kaluar.

Ndërkohë, shqiptarët që kanë udhëtuar jashtë vendit gjatë së njëjtës periudhë kanë shpenzuar 521 milionë euro. Kjo sjell një suficit prej 267 milionë euro në ekonominë tonë, krahasuar me nivelin 189 milionë euro në të njëjtën periudhë të vitit të kaluar. Të ardhurat dhe shpenzimet nga shërbimet e udhëtimit u rritën përkatësisht me rreth 26% dhe 20% në terma vjetorë.

Shqipëria ka pritur 38% më shumë turistë në pesë muajt e parë të këtij viti. Sipas statistikave zyrtare, vetëm në maj kanë ardhur rreth 974 mijë turistë të huaj, duke e çuar në më shumë se 3.3 milionë shifrën totale të flukseve turistike hyrëse në pesë muajt e parë të vitit në vendin tonë. Ndërkohë, në të njëjtën periudhë të vitit të kaluar, vendi ynë priti 2.4 milionë turistë të huaj.

Këto të dhëna tregojnë se Shqipëria po përjeton një rritje të shpejtë dhe të qëndrueshme të sektorit të turizmit, duke kontribuar ndjeshëm në ekonominë e vendit dhe duke e vendosur atë si një destinacion të preferuar turistik në rajon.