Rrymat e forta detare në Adriatik kanë nxjerrë një sasi të madhe mbeturinash në bregdetin e Dubrovnikut, duke shkaktuar shqetësim tek autoritetet kroate dhe duke dëmtuar imazhin e destinacionit turistik. Sipas New York Times, mbeturinat – kryesisht plastike, qese, ambalazhe e deri materiale mjekësore – vijnë në pjesën më të madhe nga Shqipëria.

Dy nga zonat më të frekuentuara të qytetit, Plazhi i Banjës dhe Qyteti i Vjetër, u përmbytën javën e kaluar nga mbeturina të nxjerra në breg pas erërave të forta jugore. Pasoja ishte e menjëhershme: duhej një operacion pastrimi 2–3 ditor për të kthyer normalitetin në vijën bregdetare.

“Gradska Luka dhe plazhi në Dubrovnik janë përsëri të mbuluara me mbeturina. Pas çdo ere jugore, rrymat nga Shqipëria sjellin shishe plastike, qese dhe mbetje të tjera”, raporton gazeta prestigjioze amerikane, duke cituar burime lokale.

Autoritetet kroate konfirmuan se, bazuar në etiketat dhe materialet e gjetura, pjesa dërrmuese e mbeturinave vijnë nga brigjet shqiptare. Adriatiku, si një det pothuaj i mbyllur, ka rryma mjaft të parashikueshme që i drejtojnë mbetjet drejt Kroacisë sa herë fryjnë erërat jugore.

Problemi nuk është i ri. Prej vitesh, Dubrovniku përballet me ton mbeturina të bartura nga jugu. Disa banorë kanë raportuar madje edhe kafshë të ngordhura që sjellin dallgët.

Në një qytet me vetëm 42 mijë banorë, por me 4.5 milionë netë qëndrimi turistësh në vit, plastika dhe ndotja përbëjnë një kërcënim serioz për industrinë e turizmit. Për këtë arsye, Dubrovniku nënshkroi në vitin 2020 një marrëveshje për reduktimin e mbetjeve plastike, megjithëse sfida mbetet ende e madhe.