Sekretari amerikan i Shtetit, Marco Rubio, i bëri sot thirrje Iranit që të tregojë gatishmëri për lëshime në negociatat e ardhshme me Shtetet e Bashkuara, duke theksuar se bisedimet duhet të trajtojnë një sërë çështjesh thelbësore për të pasur një rezultat “kuptimplotë”.

“Nëse iranianët duan të takohen, ne jemi gati”, deklaroi Rubio, duke iu referuar negociatave të planifikuara për këtë të premte. Ai theksoi se në tryezën e bisedimeve duhet të përfshihen programi bërthamor dhe ai balistik i Iranit, mbështetja e Teheranit për organizata të cilësuara terroriste në rajon, si dhe trajtimi i popullit iranian nga autoritetet e vendit.

“Në fund të fundit, SHBA-ja është e përgatitur të angazhohet dhe gjithmonë ka qenë e përgatitur të angazhohet me Iranin”, u shpreh Rubio para gazetarëve.

Nga ana e tij, Irani ka refuzuar publikisht të bëjë lëshime në programin e raketave, por ka sinjalizuar gatishmëri për të pranuar kufizime në aktivitetet bërthamore. Sipas mediave iraniane, negociatat mes dy vendeve do të rifillojnë këtë të premte në Oman në format “indirekt”, ku ministri i Jashtëm i Omanit do të ndërmjetësojë mesazhet mes palëve, ashtu si edhe në raundet e mëparshme.

Teherani ka konfirmuar se do të përfaqësohet nga ministri i Jashtëm Abbas Araghchi, ndërsa pala amerikane do të ketë të pranishëm të dërguarin special Steve Witkoff. Rubio nuk e konfirmoi zyrtarisht Omanin si vendin e zhvillimit të takimit.

Ndërkohë, Shtetet e Bashkuara kanë rritur praninë e tyre ushtarake në Lindjen e Mesme. Aeroplanmbajtësja “USS Abraham Lincoln” dhe disa anije të tjera luftarake kanë mbërritur tashmë në rajon, në një sinjal të qartë presioni paralel diplomatik dhe ushtarak ndaj Teheranit.