Rusia ka ndaluar furnizimin me gaz në Poloni, treguan të dhënat nga rrjeti i operatorëve të transmetimit të gazit të Bashkimit Evropian, në një thellim të përçarjes midis Perëndimit dhe Rusisë për pushtimin e saj në Ukrainë.

Bullgaria, ashtu si Polonia një anëtare e NATO-s dhe BE-së, tha më herët se Rusia do të ndalonte gjithashtu furnizimet me gaz për të. Nuk ka informacion deri tani nëse furnizimi do të ndalojë edhe për Bullgarinë.

Ukraina akuzoi Rusinë për shantazhimin e Evropës në lidhje me energjinë, në një përpjekje për të thyer aleatët e saj, ndërsa luftimet vazhdojnë në muajin e tretë pa pushtimin e ndonjë qyteti të madh nga Rusia.

Kundërshtari i vendosur i Kremlinit, Polonia, është ndër vendet evropiane që kërkon sanksionet më të ashpra kundër Rusisë për pushtimin e fqinjit të saj.

Kontrata e furnizimit me gaz të Polonisë me gjigantin energjetik Gazprom (GAZP.MM) është për 10.2 miliardë metra kub (bcm) në vit dhe mbulon rreth 50% të konsumit kombëtar.

Kompania shtetërore e Polonisë PGNiG kishte thënë se furnizimet nga Gazprom nëpërmjet Ukrainës dhe Bjellorusisë do të ndërpriteshin në orën 8 të mëngjesit të mërkurën, por Polonia tha se nuk kishte nevojë të merrte nga rezervat, pasi ka akses të furnizohet nga burime të tjera.

Presidenti rus Vladimir Putin u ka bërë thirrje vendeve “jomiqësore” që të paguajnë për importet e gazit në rubla, një kërkesë që vetëm pak blerës e kanë zbatuar.

“Qëllimi përfundimtar i udhëheqjes ruse nuk është vetëm të pushtojë territorin e Ukrainës, por të copëtojë të gjithë qendrën dhe lindjen e Evropës dhe t’i japë një goditje globale demokracisë”, tha të martën vonë presidenti i Ukrainës, Volodymyr Zelenskiy.

Shefi i tij i shtabit, Andriy Yermak, tha se Rusia “po fillonte shantazhin e gazit të Evropës”.

“Rusia po përpiqet të shkatërrojë unitetin e aleatëve tanë,” tha Yermak.

Bullgaria, e cila është pothuajse tërësisht e varur nga importet e gazit rus, tha se kishte përmbushur të gjitha detyrimet e saj kontraktuale me Gazprom dhe se skema e re e propozuar e pagesës ishte në kundërshtim me marrëveshjen.

Ajo ka zhvilluar bisedimet fillestare për të importuar gaz natyror të lëngshëm përmes Turqisë dhe Greqisë fqinje.

Gazprom tha se nuk kishte pezulluar ende furnizimet në Poloni, por se Varshava duhej të paguante për gazin në përputhje me “urdhrin e saj të ri të pagesave”. Gazprom nuk pranoi të komentojë në lidhje me Bullgarinë.

Pushtimi i Ukrainës, i nisur më 24 shkurt, ka lënë pas mijëra të vdekur dhe të plagosur, ka shkatërruar qytete dhe ka detyruar më shumë se 5 milionë njerëz të ikin jashtë vendit.

Moska i quan veprimet e saj një “operacion special” për të çarmatosur Ukrainën dhe për ta mbrojtur atë nga fashistët.