Ukrainë, 16 qershor 2025 – Rusia ka dorëzuar 1.200 trupa të vrarë ukrainas, të cilët sipas autoriteteve ruse i përkasin ushtarëve të rënë në vijën e frontit, njoftoi këtë të dielë Shtabi Koordinues i Ukrainës për Trajtimin e të Burgosurve të Luftës.

Riatdhesimi masiv vjen në vazhdën e bisedimeve të fundit dypalëshe të zhvilluara në Stamboll, që përkundër mungesës së një armëpushimi politik, prodhuan marrëveshje për shkëmbimin e të burgosurve dhe trupave të të vdekurve.

“Edhe 1.200 trupa, që pala ruse pretendon se i përkasin qytetarëve ukrainas, janë rikthyer në vend. Autoritetet përkatëse do të punojnë për identifikimin e tyre”, thuhet në deklaratën zyrtare të publikuar në Telegram.

Me këtë kthim, numri total i trupave ukrainas të dorëzuar nga Rusia arrin në 4.012. Në të njëjtën kohë, Moska raporton se ka marrë vetëm 27 trupa të ushtarëve rusë nga Ukraina deri më tani – një bilanc që ilustron pabarazinë në këmbimet mortore.

Ndërsa diplomacia ngec, terreni vijon të digjet. Ministria ruse e Mbrojtjes njoftoi se forcat e saj kanë marrë kontrollin e fshatit Malinivka në rajonin e përgjakur të Donjeckut. Po sipas të njëjtës ministri, një sulm me raketa ka goditur një rafineri karburanti në qytetin Kremençuk, e cila, sipas Moskës, furnizonte forcat ukrainase në frontin lindor.

Pretendimet nuk janë verifikuar në mënyrë të pavarur, ndërkohë që Ukraina raportoi një tjetër valë sulmesh masive gjatë natës. Presidenti Volodymyr Zelensky tha se Rusia lëshoi 183 dronë dhe 11 raketa, prej të cilëve 167 janë shkatërruar nga mbrojtja ajrore ukrainase.

“Sulmi synonte kryesisht rajonin e Poltavës dhe Kremençukun. Rusia po e bën këtë prej katër vitesh, dhe intensiteti po rritet. Sanksione të reja ndaj Moskës janë të domosdoshme,” deklaroi Zelensky, duke iu bërë thirrje vendeve të G7-ës dhe BE-së për masa më të ashpra në javët në vijim.

Në këtë atmosferë tensioni, vëmendja e botës do të përqendrohet në samitin e G7-ës që mbahet në Kanada më 15–17 qershor. Ndërkohë, presidenti ukrainas ka konfirmuar pjesëmarrjen, ku do të takohet me presidentin amerikan Donald Trump – i cili ka shprehur gatishmërinë për të ndërmjetësuar një marrëveshje paqeje, por ka paralajmëruar sanksione të reja edhe ndaj Ukrainës nëse bisedimet ngecin.

“Putin ndien, ashtu si unë, se lufta duhet të përfundojë,” shkroi Trump pas një telefonate me presidentin rus më 14 qershor.

Ndërsa bota përpiqet të gjejë rrugëdalje diplomatike, lufta në Ukrainë vijon të marrë jetë çdo ditë – me dronë, me raketa, dhe me trupat e ftohtë që kthehen në atdhe.