Rusia mund të lëshojë një raketë të dytë balistike supersonike, Oreshnik, në Ukrainë në ditët në vijim, por Uashingtoni nuk beson se kjo do të ndryshojë ndjeshëm situatën në luftë, tha një zyrtar amerikan. Ky i fundit vlerësoi se përdorimi i raketës Oreshnik do të jetë thjesht një tjetër përpjekje e Rusisë për të terrorizuar Ukrainën dhe nuk pritet të ndikojë në fushën e betejës.

Rusia e lëshoi raketën e parë Oreshnik në Dnipro më 21 nëntor, si përgjigje ndaj sulmit ukrainas në territorin rus me raketa amerikane dhe britanike. Megjithatë, zyrtari amerikan theksoi se Oreshnik nuk do të ndryshojë përfundimisht dinamikën e luftës.

Ndërkohë, presidenti rus Vladimir Putin ka deklaruar se mund të përdorë përsëri raketën Oreshnik për të goditur “qendrat vendimmarrëse” në Kiev, nëse Ukraina vazhdon të sulmojë me armë perëndimore me rreze të gjatë. Putin ka pohuar se raketa supersonike ka fuqi shkatërruese të krahasueshme me armët bërthamore, por zyrtarët amerikanë e kanë minimizuar fuqinë e saj, duke e konsideruar atë si “eksperimentale”.

Përveç kësaj, disa zyrtarë rusë dhe perëndimorë kanë thënë se lufta është duke hyrë në fazën përfundimtare, ndërsa presidenti i sapo zgjedhur i SHBA-së, Donald Trump, i cili do të marrë detyrën në janar 2025, ka bërë thirrje për armëpushim dhe negociata, duke vënë në pikëpyetje mbështetjen afatgjatë të Uashingtonit për Ukrainën.