Ambasadori i Rusisë në OKB, Vassily Nebenzia, i ka paralajmëruar vendet perëndimore se nëse lejojnë Ukrainën të përdorë armë me rreze të gjatë për të sulmuar territorin rus, atëherë vendet e NATO-s do të përfshihen drejtpërdrejt në luftë me Rusinë. Gjatë një takimi të Këshillit të Sigurimit të OKB-së, Nebenzia theksoi se një përshkallëzim i tillë do të kishte pasoja të rënda, veçanërisht duke marrë parasysh statusin e Rusisë si një fuqi bërthamore.

Komentet e tij përforcojnë deklaratat e presidentit rus Vladimir Putin, i cili të enjten paralajmëroi se çdo vendim perëndimor për të lejuar Ukrainën të sulmojë objektiva brenda Rusisë do të konsiderohej si një akt lufte nga ana e NATO-s. Putin theksoi se një veprim i tillë do të ndryshonte natyrën e konfliktit dhe do të sillte pasoja të paparashikuara.

Zëdhënësi i Kremlinit, Dmitry Peskov, po ashtu nënvizoi se mesazhi i Putinit ishte drejtuar qartë perëndimit dhe se ai kishte arritur tek liderët e vendeve të NATO-s.

Në këtë kontekst, kryeministri i Mbretërisë së Bashkuar, Keir Starmer, ndodhet në Uashington për t’u takuar me presidentin amerikan Joe Biden. Diskutimet e tyre pritet të përfshijnë përdorimin e raketave britanike “Storm Shadow” nga Ukraina, të cilat mund të godasin caqe brenda Federatës Ruse, duke rritur kështu tensionet mes Rusisë dhe NATO-s.