Ministria ruse e Mbrojtjes njoftoi se të shtunën, 19 shkurt, do të mbahen stërvitje të reja ushtarake, të cilat do të mbikëqyren nga presidenti rus, Vladimir Putin, në kohën e shqetësimeve se vendi mund të jetë duke u përgatitur për pushtim të Ukrainës.

Por një zëdhënës i Kremlinit ka thënë se stërvitjet dhe testimi i raketave balistike zhvillohen rregullisht dhe kjo nuk duhet të shkaktojë asnjë shqetësim, raporton The Guardian.

Zëdhënësi shtoi se Presidenti Vladimir Putin do të mbikëqyrë stërvitjet gjatë së cilave do të lëshohen raketa balistike dhe lundruese, pa dhënë detaje të mëtejshme.

Ministria ruse e mbrojtjes tha se stërvitjet “do të përfshijnë mjetet dhe pajisjet e Forcave Ajrore, Distriktin Ushtarak Jugor, Trupave Raketore Strategjike dhe flotën e Detit Verior dhe të Zi”, raporton agjencia ruse e lajmeve Interfax.

“Stërvitja e forcave të kontrollit strategjik ishte planifikuar paraprakisht për të kontrolluar gatishmërinë e trupave të komandës ushtarake, ekuipazheve të lëshimit të raketave, ekuipazheve të anijeve detare dhe të transportuesve strategjikë të raketave për të kryer detyrat e caktuara, si dhe besueshmërinë e armatimeve të forcave bërthamore dhe jobërthamore”, tha ministria.

Inteligjenca amerikane vlerëson se rreth 130,000 trupa dhe pajisje ushtarake gjenden në zonat në kufi me Ukrainën.