Zyrtarët ukrainas raportojnë se Rusia ka lëshuar 28 dronë dhe tri raketa lundruese gjatë një sulmi në qytetin Dnipro. Sulmet kanë shkaktuar plagosjen e 12 personave. Në një postim në Telegram, Forcat Ajrore të Ukrainës thonë se janë shkatërruar 21 nga 28 dronët, të cilat kryesisht shënjestruan lokacione në jug dhe lindje të vendit.

Sulmi i 7 janarit tregon se Rusia vazhdon të shënjestrojë infrastrukturën civile ukrainase, edhe pse në shkallë më të vogël sesa sulmet e mëparshme ajrore. Zyrtarët ukrainas bëjnë thirrje për furnizim të shtuar me armë të mbrojtjes ajrore nga aleatët. Ndërkaq, raportohet se Rusia ka përdorur raketa balistike nga Koreja e Veriut në sulmet ndaj Ukrainës.

“Armiku po e zhvendos fokusin e sulmeve në territoret në vijën e fronit: rajonet e Hersonit dhe Dnipropetrovskit janë sulmuar nga dronët”, tha zëdhësi i Forcave ajrore, Yuriy Ihnat, për një televizion ukrainas.

Gjatë dy javëve të fundit, Rusia ka gjuajtur pothuajse 300 raketa dhe ka kryer sulme me mbi 200 dronë në Ukrainë, si pjesë e përpjekjeve të saj për të terrorizuar popullatën civile dhe për të minuar moralin e tyre. Më 29 dhjetor, mbi 120 raketa ruse u lëshuan në qytetet në mbarë Ukrainën, duke vrarë 44 persona, përfshirë 30 viktima vetëm në Kiev.