Komediani dhe aktori britanik, Russell Brand, ka reaguar për herë të parë publikisht pas akuzave të rënda për përdhunim dhe abuzim seksual, të ngritura zyrtarisht nga Policia Metropolitane e Londrës. Në një video të publikuar në platformën Rumble, Brand mohoi kategorikisht çdo veprim të paligjshëm, duke theksuar se e kaluara e tij e trazuar nuk përfshin kurrë sjellje jo konsensuale.

“Unë isha budalla para se të njihja dritën e Zotit. Isha një i varur nga droga, një i varur nga seksi dhe një idiot, por kurrë nuk jam angazhuar në një veprim jo konsensual”, deklaroi Brand, duke nënvizuar se tani ka mundësinë të mbrohet ligjërisht në gjykatë dhe është mirënjohës për këtë.

Sipas aktakuzës, Brand përballet me pesë vepra penale të dyshuara që lidhen me katër gra të ndryshme, për ngjarje të ndodhura mes viteve 1999 dhe 2005. Midis akuzave përfshihet një përdhunim në Bournemouth në 1999, seks i detyruar oral dhe sulm seksual në Westminster në 2004, si dhe dy raste të tjera të sulmeve seksuale.

Akuzat dolën në dritë pas një hetimi të përbashkët nga The Sunday Times, The Times dhe Channel 4 Dispatches, i publikuar në shtator 2023. Një nga rastet më të rënda përfshin një grua që pretendon se është përdhunuar nga Brand në shtëpinë e tij në Los Angeles, dhe më pas ka kërkuar ndihmë mjekësore – një fakt që është konfirmuar përmes dokumentacionit zyrtar.

Pavarësisht akuzave, Brand e konsideron situatën si pjesë e një presioni politik dhe ligjor ndaj atyre që, sipas tij, kundërshtojnë korrupsionin. “Ligji po përdoret si mjet për të frikësuar ata që nuk e tolerojnë korrupsionin”, u shpreh ai.

Brand aktualisht jeton në Florida dhe ka vijuar aktivitetin e tij online përmes platformës Rumble, ku premtoi se “shfaqja do të vazhdojë”. Ai falënderoi ndjekësit për mbështetjen, ndërsa betejat ligjore përballë drejtësisë sapo kanë nisur.