Zgjedhja e Presidentit të ri të Republikës ka bërë që të shumë emra të përfliten për pasardhësin e Ilir Metës pas 24 korrikut. Kreu i Partisë Lëvizja për Zhvillim Kombëtar (LZHK), Dashamir Shehi,është pyetur lidhur me ndjesitë që ka patur pasi u propozua për president nga kreu i PAA, Agron Duka. Mirëpo ky lajm duket se nuk e ka surprizuar Shehin, i cili tha se sa herë ka zgjedhje për president emri i tij lakohet, por as kësaj here nuk do të jetë ai.

Shehi: Emrin tim e kanë thënë përherë.

Xhokaxhi: Si ka mundësi që sa herë ka zgjedhje për president, lakohet emri juaj?

Shehi: Unë jam një personazh komod, këtyre që kanë pushtetin nuk ju vjen mirë. Unë e falënderoj zotin Duka, por zgjedhja e presidentit është një proces politik. Që nga viti 2008-të Presidenti i Shqipërisë është një njeri partie, deri dje ishin dy të PD-së, ndërsa herën e fundit ishte i PS-së dhe LSI-së. Unë them që kjo që ndodhi në 2008-n e zhveshi presidentit.

Xhokaxhi: Por nuk është zgjedhje e parëndësishme?

Shehi: Kjo është një gjë në dorë të Ramës. Ai njeriun e vet do vejë, por ta marrë seriozisht mos e bëj një lloj tallavaje, pasi do zhvlerësojë personazhin që do vëjë në krye.

Xhokaxhi: Duhen negociatat me opozitën?

Shehi: Edhe opozita duhet të tregojë seriozitetin e vet, duhet të kishte nxjerrë disa personazhe për të thënë se edhe ne i kemi ca burra, edhe pse do e zgjedhë Rama. Por edhe për tu thënë ndërkombëtarëve që ne po fillojmë një linjë institucionale. Por shumë gjëra varen nga PS, sepse nëse ata do e degjenerojnë procesin, opozita nuk duhet të merret fare.