Kryetari i Partisë Demokratike, Sali Berisha, ka dalë dje në një konferencë për mediat për të denoncuar veprimet e kryeministrit Edi Rama, të cilat sipas tij rrezikojnë të ardhmen e Shqipërisë në Bashkimin Europian.

Berisha u shpreh se informacionet nga kancelaritë evropiane dhe Brukseli tregojnë se Rama ndodhet “në rreth të kuq” dhe se po vepron për interesa personale dhe për mbrojtjen e vetes nga akuza për krime të rënda. Ai paralajmëroi se kryeministri është i gatshëm të marrë çdo vendim, edhe nëse kjo bllokon plotësisht procesin e integrimit:

“Sot jam këtu për të denoncuar kërcënimin madhor që Edi Rama dhe mafia e rrezikshme që qëndron prapa tij, në qeveri, parlament dhe institucione të tjera, po kërcënojnë procesin më jetik të shqiptarëve, procesin e integrimit në BE… Për interesa të pushtetit të tij, për të mbrojtur veten nga krimet e rënda, është i aftë të marrë çdo vendim pavarësisht se bllokon integrimin në BE.”

Berisha gjithashtu paralajmëroi shqiptarët se kryeministri po përpiqet të mbrojë imunitetin e Ballukut, duke u përpjekur të shmangë përgjegjësinë e tij personale për aferat e AKSHI-t dhe lidhjet e tij me raste korruptive.

“Ai e di mirë se tashmë gjithçka ka dalë në dritën e diellit, dhe përpëlitet për t’i shpëtuar drejtësisë,” tha Berisha, duke bërë thirrje për mobilizim qytetar ndaj qeverisë aktuale.

Ky reagim vendos theksin tek rreziku që sipas Berishës kryeministri po i shkakton perspektivës europiane të Shqipërisë dhe lidhjes së tij personale me dosjet e korrupsionit.