Kryetari i Partisë Demokratike, Sali Berisha, ka mbajtur sot një fjalim të fuqishëm dhe alarmues në Asamblenë Parlamentare të Partive Popullore Europiane (PPE), ku ka paraqitur gjendjen sipas tij dramatike në të cilën ndodhet Shqipëria, duke akuzuar qeverinë e Edi Ramës për lidhje të drejtpërdrejta me kartelet ndërkombëtare të drogës dhe për manipulim masiv të zgjedhjeve.

“Shqipëria është i vetmi narko-shtet në Europë”

Në një fjalim që zgjoi vëmendje dhe reagime të forta mes të pranishmëve, Berisha deklaroi se Shqipëria është kthyer në narko-shtetin e vetëm në Europë, ku droga, krimi dhe pushteti janë bërë një.

“Zoti Kryeministër i Shqipërisë dha 138 licenca për kultivim droge. Nëse ligji lejon 200 hektarë, ai dha 29,000 hektarë. Më shumë se 100 milionë rrënjë kanabis,” tha Berisha.

Ai shtoi se kartele shqiptare të drogës kontrollojnë portet, bashkëpunojnë me policinë, prokurorinë dhe vetë Kryeministrin, dhe janë të lidhura me organizata të njohura ndërkombëtare kriminale si karteli Sinaloa (Meksikë), Medelin, Bolivia, Peru dhe Ekuadori.

Akuzat për zgjedhje të manipuluara

Berisha foli me tone të forta edhe për zgjedhjet vendore të 11 majit, që sipas tij ishin një “farsë zgjedhore”.